ئه‌نجومه‌نی ناوه‌ندی داوا ده‌كات گه‌ڕانه‌وه‌ی كه‌ركوك بخرێته‌ بواری پراكتیكیيه‌وه‌

ئەنجومەنی ناوەندی بە میوانداری دکتۆر نەجمەدین کەریم پارێزگاری کەرکوک كۆبووه‌وه‌

 

ئەمڕۆ ٢٠١٥/٥/٢٨ ئەنجومەنی ناوەندی بە میوانداری دکتۆر نەجمەدین کەریم پارێزگاری کەرکوک و ئەندامی مەکتەبی سیاسی ی.ن.ک کۆبوونەوەی ئاسایی مانگانەی خۆی ئەنجامدا.
دوای تاوتوێکردنی چەندین پرس و تەوەرەی گرنگ، ئەنجومەنی ناوەندی بە کۆی دەنگ ئەم بەیاننامەیەی پەسەندکرد، کە ئەمە دەقەکەیەتی:

راگەیەندراوی کۆبوونەوەی فراوانی مانگی مایسی ٢٠١٥ ی ئەنجومەنی ناوەندی
سەرەتا بەبۆنەی یادی (٤٠) یەمین ساڵرۆژی دامەزراندنی یەکێتیی نیشتمانیی کوردستانەوەو (٣٩) یەمین ساڵرۆژی هەڵگیرساندنی شۆڕشی نوێی گەلەکەمان گەرمترین پیرۆزبایی ئاأاستەی کەسوکاری سەربەرزی شەهیدان و سەرۆک و رابەرمان هەڤاڵ مام جەلال سکرتێری گشتی یەکێتیی نیشتمانیی کوردستان و پێشمەرگە قارەمانەکان و هەموو هەڤاڵانی یەکێتی و جەماوەری کوردستان بەگشتی دەکەین، هەر بەم بۆنە پیرۆزەوە داوا لەسەرجەم ئۆرگانەکانی یەکێتی دەکەین لە ساڵرۆژی دامەزراندنی یەکێتییەکەیاندا هەموومان پێکەوە سەردانی خانەوادە سەربەرزەکانی شەهیدان بکەین و بەڵێن تازەبکەینەوە کە درێژە بەرێبازی پیرۆزی شەهیدان بدەین و پارێزەری پاراستنی یەکێتی ناو یەکێتیی نیشتمانیی کوردستان بین و پێکەوەش کار بۆ ئەنجامدانی کۆنگرەیەکی سەرکەوتوو بکەین.
هەروەک پشتگیری لە کۆبوونەوەی سەرکردایەتی یەکێتیی نیشتمانیی کوردستان دەکەین کە هەوڵێکی زۆرمان بۆ داوەو بڕیارە لە رۆژی ١/٦ بە حزوری هەڤاڵ و رابەرمان مام جەلال ئەنجامبدرێت.
لە کۆبوونەوەی ئەنجومەندا چەند تەوەرێکی گرنگ تاوتوێکران و بەکۆی دەنگ ئەم بەیاننامەیە پەسەندکرا:
١- دوای تاوتوێکردنی رەوشی کەرکوک لەگەڵ هەڤاڵ دکتۆر نەجمەدین کەریم ئەندامی مەکتەبی سیاسی و پارێزگاری کەرکوک، خوێندنەوەیەکی سیاسی و واقعیانەی پارێزگای کەرکوک و پێشهاتەکانی کراو دەستنیشانکردنی ستراتیژی کارکردنی هەنوکەیی سیاسی و کارگێڕی کراو وێڕای باسکردنی پلانەکانی ئایندەو رێکارەکان بۆ سەرخستنی پرۆسەی سیاسی و پێکەوەژیانی ئاشتیانە لەپارێزگای کەرکوک.
ئەنجومەن جارێکی دیکە پشتگیری خۆی بۆ پارێزگارو ئیدارەی کەرکوک دووپاتدەکاتەوە بەرامبەر بەدڵسۆزی و دەسکەوتەکانی پارێزگاری کەرکوک و خۆڕاگری جەماوەری کەرکوک و سەرکەوتنەکانی هێزی پێشمەرگەی کوردستان لەو سنورە، هەروەها ئەنجومەنی ناوەندی داوا لەلایەنە پەیوەندیدارەکانی هەرێمی کوردستان دەکات کە بەرنامەیەکی جدی و پراکتیکیان هەبێت بۆ گەڕانەوەی کەرکوک و ناوچە دابڕێنراوەکانی دیکەی کوردستان کە بەخوێن رزگارکران و پارێزگارییان لێدەکرێت بۆ سەر هەرێمی کوردستان، چونکە جەماوەری ئەو ناوچانە لەدروشمی بریقەداری بێکردار بێزاربوون.

٢- ئەنجومەنی ناوەندی جارێکی دیکە جەخت دەکاتە سەر هەڵویستی خۆی سەبارەت بە سیستمی سیاسی لە هەرێم کە:
* هەموارکردنی رەشنووسی دەستوری هەرێم و سازان لەسەری.
* چەسپاندنی سیستمی پەرلەمانی تەواوەتی لەپرۆژەی دەستوری هەرێمدا.
* گونجاندنی دەسەڵاتەکانی هەر سێ سەرۆکایەتی هەرێم و مادەو بڕگەکانی تری پرۆژەکە لەگەڵ سیستمی پەرلەمانیدا.
هەروەها دەستخۆشی لەیەکێتی دەکات بۆ دیاریکردنی پسپۆڕێکی بواری یاسایی لەلیژنە (٢١) کەسیەکەی تایبەت بە دەستوری هەرێم کە خەڵکی ناوچە دابڕێنراوەکانەو هیوادارین بەشێوەیەکی شایستە کەرکوک و ناوچە دابڕێنراوەکانی دیکە لەناو دەستوری هەرێمدا وەک بەشێکی گرنگی کوردستان گرنگی پێبدرێت و تایبەتمەندیان رەچاوبکرێت.

٣- بەرامبەر بە گەلی کوردستان بەگشتی و جەماوەری باکوری کوردستان بەتایبەتی، سەربەرزین کە ئەمڕۆ لە گەرمەی بانگەشەی هەڵبژاردنێکی چارەنوسسازدا دەیان کادیری پسپۆڕی بواری هەڵبژاردنی سەر بە یەکێتیی نیشتمانیی کوردستان لە شارو شارۆچکەکانی باکوری کوردستان پشتگیری لە نوێنەرانی خەڵکی کوردستان لە باکور دەکەن کە (HDP) یە، ئەمەش لەلایەکەوە داهێنانێکی نوێی شێوازی خەباتی نەتەوەکەمانە، لەلایەکی دیکەوە ئەرکێکی نەتەوەیی و نیشتمانی و ئەخلاقییە لەپێناو سەرخستنی لیستی (HDP) کە پرۆسەی ئاشتی لەو وڵاتە بەندە بە سەرکەوتنی ئەو لیستەوە، کە هەڤاڵ مام جەلال لەسەرەتای نەوەتەکانی سەدەی رابردوو  ئەندازیاری داڕشتنی بیرۆکەی پرۆسەی ئاشتی بووە لەو وڵاتە لەپێناو چارەسەرکردنی دۆزی کورد بەشێوەیەکی دیموکراسیانەو ئاشتیانە.

٤- ئەنجومەنی ناوەندی پشتگیری لە هەوڵەکانی یەکێتیی نیشتمانیی کوردستان دەکات لەپێناو ئاساییکردنەوەی پەیوەندییەکانی نێوان (PKK) و حزبی دیموکراتی کوردستانی ئێران، لەو بڕوایەدایە ئەم قۆناغە زیاتر لەهەر کاتێکی دیکە گەلی کوردستان لەهەر چوارپارچە پێویستی بە یەکڕیزی و ئەنجامدانی کۆنگرەی نەتەوەییە.
٥- ئەنجومەنی ناوەندی داوادەکات وەک چۆن لەپارێزگاکانی سلێمانی و هەڵەبجە پۆستە ئیدارییەکان بەپێی ئیستیحقاقی هەڵبژاردن و بەشێوازی تەوافوق لەچواچێوەی حکومەتی بنکەفراواندا دابەشکران، بەهەمان شێوە لەسنوری پارێزگاکانی هەولێرو دهۆک و موسڵ دابەشبکرێن.

٦- ئەنجومەنی ناوەندی پشتگیری لە هەوڵی تێکۆشەرە دێرینەکانی یەکێتیی نیشتمانیی کوردستان دەکات لەپێناو پاراستنی یەکێتی ناو یەکێتیی نیشتمانیی کوردستان.

نەمری بۆ شەهیدانی گەلەکەمان…
سڵاو لەپێشمەرگە قارەمانەکانی کوردستان…

ئەنجومەنی ناوەندی
یەکێتیی نیشتمانیی کوردستان
٢٨/٥/٢٠١٥

‌