دانیمارک/ چله‌ی ماته‌مینی هونه‌رمه‌ندو پێشمه‌رگه‌ حه‌مه‌ جه‌زا

ڕاگه‌یاندنی کۆمیته‌ی رێکخستنی دانیمارک

له‌ ڕیوره‌سمێکی پڕ شکۆدا رۆژی دوای نیوه‌ڕۆی ڕۆژی 14/11 به‌ ئاماده‌بوونی هاوسه‌رومنداله‌کان  و بنه‌ماڵه‌ی کۆچکردوو حه‌مه‌ جه‌زا وبنه‌ماڵه‌ی سه‌ربه‌رزی شه‌هیدان و باڵیۆزی عێراقی فیدڕال ونوێنه‌ری حزب ولایه‌نه‌ عێراقی وکوردستانیه‌کان و کۆمه‌ڵه‌و ڕیکخراو که‌سایه‌تی وژماره‌یه‌کی به‌رچاوی پێشمه‌رگه‌ی دیرین وڕه‌وه‌ندی کوردی نیشته‌جێی دانیمارک چله‌ی کۆچکردوو به‌ڕێوه‌چوو.

سه‌ره‌تا بۆ ڕێزگرتن له‌ گیانی پیرۆزی شه‌هیدان و هونه‌رمه‌ندو پێشمه‌رگه‌ی کۆچکردوو ساتێک به‌بێده‌نگی راوه‌ستان، دواتر چه‌ند ئایه‌تێک له‌ قورئانی پیرۆز خوێنرایه‌وه‌. پاشان باڵیۆزی عێراق وته‌یه‌کی به‌هه‌ردوو زمانی کوردی وعه‌ره‌بی  ده‌رباره‌ی گه‌وره‌یی وماندوونه‌ناسی حه‌مه‌جه‌زا له‌هه‌ردوو بواری هونه‌ری وپێشمه‌رگایه‌تیدا پێشکه‌ش کرد.

هه‌ر له‌مه‌راسیمه‌که‌دا چه‌ندین شیعروپه‌خشان خوێندرانه‌وه‌وبه‌ ئامێری سینه‌ماڤیژن فلیمێکی دۆکیومێنتاری له‌سه‌ر ژیان وهونه‌ری حه‌مه‌جه‌زا پێشکه‌شکرا، هه‌ریه‌ک له‌ هیمداد تاهیر وخاڵه‌ حه‌مه‌ی شاعیر به‌ وته‌و په‌خشان وشیعر به‌شداریانکرد، له‌ به‌شێکی تری مه‌راسیمه‌که‌دا به‌هاوکاری که‌مانچه‌ژه‌نی به‌توانا گۆران ئیبراهیم خه‌یات وهاوڕێ مه‌حموود چه‌ند هۆنراوه‌یه‌کی بڵاونه‌کراوه‌ی حه‌مه‌جه‌زایان پێشکه‌شکرد.

دواتر به‌ وتاری بنه‌ماڵه‌ له‌لایه‌ن کاک ته‌ها کۆڕی حه‌مه‌ جه‌زا وه‌ پیشاندانی دواڤیدۆکلیپی هونه‌ری به‌ناوی (شه‌هید) کۆتایی به‌ چله‌ی کۆچکردوو حه‌مه‌جه‌زا هات.