عیماد ئه‌حمه‌د به‌رپرسی مه‌كته‌بی رێكخستن: له‌مه‌ودوا داموده‌زگای رێكخستنمان له‌سه‌ر بنه‌مای چڕی دانیشتوان، ژماره‌ی رێكخستن و گرنگی ناوچه‌كه‌ ده‌بێت

گفتوگۆ-شیروان حامد‌ /کوردستانی نوێ

دوای شه‌ش مانگ له‌سێیه‌مین كۆنگره‌ی ی.ن.ك، مه‌كته‌بی رێكخستن به‌رنامه‌یه‌كی نوێی دانا بۆ كاری رێكخستن له‌ مه‌ڵبه‌نده‌كان له‌ناوخۆو له‌سه‌ر ئاستی ده‌ره‌وه‌. له‌م گفتوگۆیه‌ی كوردستانی نوێدا، عیماد ئه‌حمه‌د به‌رپرسی مه‌كته‌بی رێكخستنی یه‌كێتیی نیشتمانیی كوردستان باسی بارودۆخی رێكخستنه‌كان له‌دوای كۆنگره‌ ده‌كات له‌ده‌ره‌وه‌و ناوه‌وه‌ی كوردستان، ئاماژه‌ ده‌دات به‌ گۆڕانكاری مه‌ڵبه‌نده‌كان و كه‌مكردنه‌وه‌یان و ئه‌و ئاسته‌نگانه‌ی له‌وه‌دا هاتوونه‌ته‌ پێش، هه‌روه‌ك به‌ گشتی باسی دۆخی ئێستای یه‌كێتی ده‌كات.

*له‌دوای كۆنگره‌، بارودۆخی رێكخستنه‌كان چۆنه‌، به‌شێوه‌یه‌كی گشتی ئه‌و گۆڕانكارییانه‌ی به‌سه‌ر رێكخستندا هاتوون چیین؟

-گۆڕانكاری باش به‌سه‌ر رێكخستندا هاتووه‌، به‌تایبه‌تی دوای یه‌كگرتنه‌وه‌و یه‌كخستنه‌وه‌ی مه‌ڵبه‌نده‌كان، كادره‌كان به‌باشی به‌ گه‌ڕ كه‌وتوون. حه‌ماسێك دروستبووه‌ كه‌ هه‌موو داموده‌زگاكان به‌ گشتی له‌ناو یه‌كێتیدا له‌دوای كۆنگره‌وه‌ به‌باشى ئیشه‌كان ده‌كه‌ن و كادره‌كان هه‌ست به‌ به‌رپرسیارێتی خۆیان ده‌كه‌ن، هه‌ڵبژاردنه‌كانیش له‌ئارادابوون و به‌رده‌وام له‌ مه‌یدانی ئیشكردنی رۆژانه‌دا بوون، بۆیه‌ ئیشوكاره‌كان به‌ باشی به‌ڕێوه‌ده‌چن به‌لام كه‌موكوڕیشمان هه‌یه‌ ده‌بێت هه‌وڵبده‌ین ئه‌و كه‌موكوڕییانه‌ نه‌هێڵین.

*یه‌كێتی ئێستا چه‌ند مه‌ڵبه‌ندی هه‌یه‌؟

– ئێستا 14 مه‌ڵبه‌ند هه‌یه‌ به‌ مه‌ڵبه‌ندی ده‌ره‌وه‌ كه‌ ناومان ناوه‌ ناوه‌ندی ده‌ره‌وه‌ له‌گه‌ڵ مه‌ڵبه‌ندی پێشمه‌رگه‌.

*بیرۆكه‌ی كه‌مكردنه‌وه‌ی مه‌ڵبه‌نده‌كان له‌چییه‌وه‌ هات؟ ئایا به‌هۆی نه‌پرژان بوو به‌سه‌ر ئه‌و هه‌موو مه‌ڵبه‌نده‌ زۆرو فراوانه‌ی كه‌ هه‌بوون؟

– به‌هۆی ئه‌وه‌ی زۆری و بۆری تێكه‌وت، هه‌ر مه‌ڵبه‌ند زیادی نه‌كرد، كه‌ مه‌ڵبه‌ندمان زیاد كرد كۆمیته‌و كه‌رت و پۆل و كادریش زیادیكرد، وایلێهات هه‌یبه‌تی داموده‌زگاكانمان وه‌ك خۆی نه‌بوو، به‌كه‌می خه‌ڵكی به‌توانا یان نه‌وعیمان پێوه‌ دیاربوو، له‌هه‌ڵبژاردنه‌كانیش بۆمان ده‌ركه‌وت زۆر داموده‌زگای رێكخستن هه‌یه‌ وه‌كو پێویست نییه‌، ئه‌و زیاده‌یه‌ی كه‌ هه‌بوو بووه‌ هۆی زۆری و بۆری، هه‌ر له‌ پلنیۆمه‌وه‌ هه‌ستمان پێكردبوو، له‌هه‌ڵبژاردنه‌كانی مانگی 7/ 2009ه‌وه‌ هه‌ستمانپێكرد، ئه‌وه‌بوو له‌ پلنیۆمدا قسه‌ی له‌سه‌ركرا، وه‌ك لیژنه‌ی بالای رێكخستن دیراسه‌یه‌كمان كردو بۆمان ده‌ركه‌وت مه‌ڵبه‌نده‌كان ئه‌گه‌ر یه‌كی بخه‌ین قازانجی زیاتره‌، له‌ كۆنگره‌ بڕیاری له‌سه‌ردراو دوای كۆنگره‌ش جێبه‌جێمان كرد.

*كه‌مكردنه‌وه‌ی مه‌ڵبه‌نده‌كان هیچ گرفتێكی بۆ دروستكردن؟

-بێ گرفت نه‌بوو، توانیمان زاڵبین به‌سه‌ریدا، یه‌كگرتنه‌وه‌و یه‌كخستنه‌وه‌ی مه‌ڵبه‌نده‌كان له‌هه‌موو ناوچه‌كان وه‌ك یه‌ك نییه‌، له‌ ناوچه‌ هه‌یه‌ زۆر به‌باشی به‌ڕێوه‌چووه‌، له‌ناوچه‌ش هه‌یه‌ كێشه‌ هه‌یه‌، به‌لام به‌گشتی ئه‌گه‌ر هه‌ڵیبسه‌نگێنین سه‌ركه‌وتنمان به‌ده‌ستهێناو گرفتیش هه‌بووه‌.

* وه‌ك ده‌زانیت شاره‌كان فراوانتر بوون و گه‌ڕه‌كی نوێ دروستبوون، له‌زۆربه‌ی ئه‌و گه‌ڕه‌كه‌ نوێیانه‌ش كۆمیته‌ نییه‌، ئێوه‌ بیرتان له‌وه‌ كردووه‌ته‌وه‌ كۆمیته‌ بۆ گه‌ڕه‌كه‌ نوێییه‌كان به‌رن؟

– بڕیارمانداوه‌ له‌مه‌ودوا داموده‌زگای رێكخستنمان له‌سه‌ر ئه‌ساسی چڕی دانیشتوان، له‌سه‌ر ئه‌ساسی ژماره‌ی رێكخستن و گرنگی ناوچه‌كه‌ بێت. جا ئه‌و گه‌ڕه‌كه‌ نوێیانه‌ كه‌ دروست ده‌بن، ئه‌گه‌ر پێویستی كرد كۆمیته‌یان بۆ دروستبكه‌ین ئه‌وا بۆیان دروستده‌كه‌ین، له‌هه‌ندێ شوێن هه‌ندێ كۆمیته‌مان ده‌مج كردووه‌، مه‌رج نییه‌ ئێمه‌ هه‌ر دروستكه‌ین، جاری وا هه‌یه‌ ده‌بێت كه‌میبكه‌یته‌وه‌، ئه‌وه‌ یه‌كه‌مجاره‌ له‌ناو یه‌كێتی به‌و ژماره‌ زۆر كه‌مبكرێته‌وه‌، ئێمه‌ هه‌موو جارێك كه‌ممان زۆر كردووه‌ كه‌ ئه‌وه‌ ئاسانه‌، به‌لام ئێستا له‌گه‌ڵ مه‌ڵبه‌نده‌كان كه‌ سه‌لاحییه‌تێكی باشیان هه‌یه‌ بڕیارمانداوه‌ خۆیان چیی به‌ قازانجی رێكخستن ده‌زانن به‌رزیبكه‌نه‌وه‌ ئێمه‌ وه‌ك مه‌كته‌بی رێكخستن پشتیوانیان ده‌كه‌ین و پێشنیازه‌كانیان قبووڵده‌كه‌ین.

*ئه‌م مۆدێلی كۆمیته‌ یان كه‌رت …هتد به‌نیازن هه‌روا بمێنێته‌وه‌ یان گۆڕانكاری تێدا ده‌كه‌ن؟

-ناتوانین ئه‌وه‌ بكه‌ین چونكه‌ په‌یڕه‌و په‌سه‌ند كراوه‌ له‌ كۆنگره‌و ئه‌وه‌ شه‌ش مانگه‌ كۆنگره‌مان كردووه‌، چۆن ده‌توانین ده‌ستكاری ئه‌وه‌بكه‌ین، ئه‌مجاره‌ هه‌موومان به‌ڵێنی ئه‌وه‌مانداوه‌ له‌ په‌یڕه‌و لا نه‌ده‌ین و په‌یڕه‌و بكه‌ینه‌ ده‌ستووری ئیشكردنمان، له‌ كۆنگره‌یه‌كی تر ره‌نگه‌ ئه‌وه‌ ده‌ستكاری بكرێت، ئه‌وه‌ ده‌بێت كۆنگره‌ بڕیاری لێبدات.

*له‌دوای كۆنگره‌ ره‌نگه‌ ته‌نیا شتێك كه‌ به‌گه‌رمی باس نه‌كراوه‌ و گله‌یی هه‌ندێك كادریشه‌ مه‌سه‌له‌ی فیكره‌، ئێستا ناوبه‌ناو باسی ئه‌م مه‌سه‌له‌یه‌ ده‌كرێت ئێوه‌ له‌مباره‌یه‌ چی ده‌ڵێن؟

-راسته‌، یه‌كێتی جاران به‌وه‌وه‌ شانازی ده‌كرد كه‌ خاوه‌ن فیكره‌، به‌وه‌ ناسرا بوو كه‌ سروشتی یه‌كێتی له‌ رووی فیكرییه‌وه‌ ، له‌ رووی چینایه‌تییه‌وه‌، له‌ رووی ئیشكردنه‌وه‌ جیاوازبوو له‌گه‌ڵ لایه‌نه‌كانی تردا. به‌راستی ماوه‌یه‌كه‌ ئه‌وه‌ كاڵبووه‌ته‌وه‌، وه‌ك یه‌كێتی له‌ كۆنگره‌ش قسه‌ی له‌سه‌ر كراوه‌، له‌كۆبووه‌نه‌وه‌كانیشدا به‌رده‌وام مام جه‌لال ته‌ئكیدی له‌سه‌ر ده‌كات، ئێمه‌ له‌ مه‌كته‌بی رێكخستنیش ته‌ئكیدمان له‌سه‌ر كردووه‌ته‌وه‌ كه‌ ده‌بێت له‌مه‌ودوا زیاتر بایه‌خ به‌ لایه‌نه‌ فیكرییه‌كه‌ش بده‌ین، شان به‌شانی ئیشوكاره‌ مه‌یدانییه‌كه‌، چونكه‌ به‌ راستی ده‌بێت یه‌كێتی جیاوازی خۆی پیشانبدات له‌گه‌ڵ لایه‌نه‌كانی تردا چونكه‌ له‌سه‌ر گۆڕه‌پانه‌كه‌ لایه‌نی ئیسلامی، عه‌لمانی و له‌ناو عه‌لمانییه‌كاندا لایه‌نی چه‌پ و راست و میانڕه‌و هه‌یه‌ ئه‌مه‌ له‌ هه‌ڵوێسته‌ سیاسییه‌كاندا شتێكی زانراوه‌، به‌لام له‌ رووی فیكرو ئایدۆلۆژیاو بۆچوونه‌وه‌ ده‌بێت چ جیاوازییه‌كمان هه‌بێت، ئێمه‌ وه‌ك سۆسیال دیموكرات چ سۆسیال دیموكراتێكین، سۆسیال دیموكرات راسته‌ وه‌ك رێبازێك هه‌یه‌ به‌لام ئه‌وه‌ی ئێمه‌ له‌ كوردستان جێبه‌جێده‌كه‌ین یان ئه‌وه‌ی ئێمه‌ خۆمانی پێ پێناسه‌ ده‌كه‌ین چ جۆرێكه‌ ئه‌وه‌ به‌ راستی ده‌بێت دیراساتمان و ئه‌كادیمییمان و به‌شی رووناكبیرییمان بایه‌خێكی باش به‌و لایه‌نه‌ فیكرییه‌ بدات بۆ ئه‌وه‌ی كادره‌كانمان كه‌ ده‌چنه‌ مه‌یدانی ئیشكردنه‌وه‌ یان له‌ناو مه‌جلیسێكدا ده‌دانیشن دیار بێت كه‌ئه‌وه‌ كادیرێكى یه‌كێتییه‌ چۆن قسه‌ده‌كات له‌گه‌ڵ لایه‌نێكی تردا، خه‌ڵك هه‌ر به‌ قسه‌كردنه‌كه‌ جیاوازییه‌كه‌ هه‌ست پێبكات، به‌راستی ئه‌وه‌ لامان نه‌بووه‌ و ده‌بێت هه‌وڵی بۆ بده‌ین و ئه‌وه‌ش هه‌ماهه‌نگییه‌كی ته‌واوی ده‌وێت له‌ رووی ئه‌وه‌ی كه‌ راگه‌یاندن و رێكخستن و مه‌كته‌بی سیاسی و وته‌بێژی ره‌سمی به‌شێكن له‌وه‌و هه‌موومان ده‌بێت پێكه‌وه‌ هه‌وڵبده‌ین بۆ ئه‌وه‌ى گه‌شه‌ به‌لایه‌نه‌ فكریه‌كه‌ بده‌ین .

*رێكخستنه‌كانی ده‌ره‌وه‌ش به‌شی خۆیان گله‌ییان هه‌بووه‌، چیكراوه‌ بۆ به‌ده‌نگه‌وه‌چوونیان؟ بارودۆخی رێكخستنه‌كانی ده‌ره‌وه‌ چۆنه‌؟

– له‌ده‌ره‌وه‌ سێ حاڵه‌تمان هه‌بووه‌، پێش پلنیۆم ئه‌وه‌ حاڵه‌تێك بوو وه‌ك مه‌ڵبه‌ند ئیشیان كردووه‌، دوای جیابوونه‌وه‌ی برایانی گۆڕان له‌ده‌ره‌وه‌ دووچاری جۆرێك له‌ئیشكردن هاتوون، دوای پلنیۆم لیژنه‌ی بالای رێكخستنمان دروستكرد، هه‌روه‌ك لیژنه‌ی بالای رێكخستنی ده‌ره‌وه‌شمان دروستكردو ئیشوكاره‌كانمان به‌ڕێوه‌برد تا كۆنگره‌. 

له‌كۆنگره‌ بڕیاری لێدراوه‌ كه‌ ده‌ره‌وه‌ سروشتێكی تایبه‌تی خۆی هه‌بێت، داموده‌زگایه‌ك دروستبكه‌ین گونجاوبێت له‌گه‌ڵ سروشتی ده‌ره‌وه‌، بۆ ئه‌مه‌ش له‌ رووی به‌رنامه‌و هه‌یكه‌لیه‌تی ده‌ره‌وه‌ شته‌كانمان ته‌واو كردووه‌، به‌ڕێز مه‌كته‌بی سیاسی بڕیاری له‌سه‌رداوه‌ و مام جه‌لال ره‌زامه‌ندی نیشانداوه‌، له‌ رووی تیۆرییه‌وه‌ شته‌كانمان دارشتووه‌ له‌ هه‌یكه‌لیه‌تی ده‌ره‌وه‌و سیاسه‌تی ده‌ره‌وه‌ ماوه‌ته‌وه‌ سه‌ر پێكهاته‌كه‌ی، ئێستا كاك سامان به‌رپرسی ده‌ره‌وه‌یه‌ كه‌ ئێمه‌ ناومان ناوه‌ ناوه‌ندی ده‌ره‌وه‌ی یه‌كێتی، په‌یوه‌ندیی به‌ مه‌كته‌بی رێكخستنه‌وه‌ هه‌یه‌، داموده‌زگاكانی خۆی دروستكردووه‌و ئیشوكاره‌كانیان ده‌كه‌ن، ئێمه‌ بوارێكمان داونه‌تێ كه‌ تا نه‌ورۆز ده‌بێت هه‌موو شته‌كانیان ته‌واو بكه‌ن.

* یه‌كێتی له‌دوای كۆنگره‌ توانیویه‌تی خۆی نوێ بكاته‌وه‌؟

– به‌ڵێ، به‌لام ئه‌و نوێبوونه‌وه‌یه‌ی كه‌ هه‌موومان داوای ده‌كه‌ن جارێ نا ماویه‌تی و له‌سه‌ره‌تای رێگه‌ین.

* وه‌ك ئیشكردنی یه‌كێتی له‌دوای كۆنگره‌وه‌ به‌تایبه‌تی ته‌ركیز كراوه‌ته‌ سه‌رچی؟

– له‌ داموده‌زگای ئیشكردن، خه‌ڵكی شیاو له‌ شوێنی شیاو دابنێین، دادپه‌روه‌ریی و شه‌فافیه‌ت له‌ناو خۆماندا، دوورخستنه‌وه‌ی ته‌كه‌تولات و لیست و لیستكاری له‌ناوماندا، ته‌نسیقێكی باشتر له‌نێوان حزب و حكومه‌ت، بڕیاردان به‌ جه‌ماعی، حورمه‌تی داموده‌زگاكانمان، حورمه‌تی په‌یڕه‌وی ناوخۆمان ده‌بێت ئه‌مانه‌ پێوه‌ر بن بۆ ئیشكردنمان.

*به‌ نسبه‌ت ئه‌نجومه‌نی ناوه‌نده‌وه‌ كه‌ ماوه‌یه‌كی زۆر به‌سه‌ر دامه‌زراندنیدا تێپه‌ڕیووه‌،ئه‌م ئه‌نجومه‌نه‌ تا ئێستا ئه‌دای كاره‌كانی چۆنه‌؟

-ئه‌نجومه‌نی ناوه‌ند ده‌ستبه‌كاربووه‌، به‌لام خۆتان ده‌زانن ئه‌م ئه‌نجومه‌نه‌ ده‌وره‌ی یه‌كه‌م ده‌وره‌یه‌كی ئه‌زموونی بوو، ده‌وره‌ی دووه‌میش دوای كۆنگره‌ ئێستا خه‌ریكی داموده‌زگا و لیژنه‌كانی خۆیانن، ئه‌وانه‌ی په‌یوه‌ندییان به‌ ئێمه‌وه‌ هه‌یه‌ چه‌ند جارێك هاتوونه‌ته‌ لامان وه‌ك مه‌كته‌بی رێكخستن، ئێمه‌ش چووینه‌ته‌ لایان و كۆبوونه‌وه‌مان له‌گه‌ڵ كردوون، ده‌ستبه‌كاربوون به‌لام به‌ فیعلی زۆر شت هه‌یه‌ له‌ رووی داموده‌زگا و باره‌گای خۆیانه‌وه‌ هه‌موو ئه‌مانه‌ ته‌واو ده‌بن، وه‌ك ده‌زانن شه‌ش مانگیشه‌ كۆنگره‌ ته‌واو بووه‌، واته‌ ماوه‌یه‌كی ده‌وێت، ئه‌وان ئیشوكاره‌كانی خۆیان كردووه‌و گله‌ییمان لێیان نییه‌.

*گله‌یی هه‌ندێك له‌ كادره‌ گه‌نجه‌كانی یه‌كێتی ئه‌وه‌یه‌ كه‌ له‌ناو حزبدا چوونه‌ پێشه‌وه‌ به‌بێ بوونی پشتگیری به‌رپرسێك كارێكی سه‌خته‌، ئه‌م گله‌ییه‌ تا چه‌ند به‌جێیه‌؟

-تا كۆنگره‌ وابوو، دوای كۆنگره‌ ده‌بێت هه‌وڵبده‌ین بنبڕی بكه‌ین، لای ئێمه‌ له‌ مه‌كته‌بی رێكخستن شتی وا نییه‌، نه‌ قبووڵی ده‌كه‌ین خه‌ڵك ده‌ست له‌ ئیشوكارمان وه‌ربدات، نه‌ ئێمه‌ش ده‌ست وه‌رده‌ده‌ین له‌ داموده‌زگاكانی مه‌ڵبه‌نده‌كان هه‌موویان ئازادن، قسه‌شمان كردووه‌ هه‌م له‌گه‌ڵ مه‌كته‌بی سیاسی و هه‌م له‌گه‌ڵ داموده‌زگاكان، هه‌ریه‌كه‌و خه‌ریكی ئیش و كاره‌كانی خۆیانن، ئێمه‌ له‌ مه‌كته‌بی رێكخستنین، ئه‌م ماوه‌یه‌ ئیشده‌كه‌ین، ئیشی باشمان كرد ئه‌وا خزمه‌تی یه‌كێتی و میلله‌ته‌كه‌مان كردووه‌، ئه‌گه‌ر ئیشی خراپمان كرد ئه‌وا ده‌بێت لێپرسینه‌وه‌مان له‌گه‌ڵدا بكه‌ن.

*په‌یوه‌ندی یه‌كێتی و گۆڕان چۆنه‌؟

– سیاسه‌تی موتاره‌كه‌یه‌، جاران توندوتیژی له‌ نێوانماندا هه‌بوو، قسه‌ی راگه‌یاندن له‌نێوانماندا هه‌بوو، ئێستا هه‌ریه‌كێكمان گه‌یشتووینه‌ته‌ ئه‌و قه‌ناعه‌ته‌ی ئه‌مه‌ نه‌ له‌ قازانجی میلله‌ت و نه‌ ناوچه‌كه‌و نه‌ سیاسه‌ته‌ گشتییه‌كه‌یه‌، ئه‌وه‌ زیان له‌ هه‌مووان ده‌دات، ئه‌وان رێگه‌ی خۆیان گرتووه‌و گه‌ردنیان ئازاد بێت، هیوای سه‌ركه‌وتنیان بۆ ده‌خوازین، بوونیان هه‌یه‌ له‌ گۆڕه‌پانه‌كه‌دا، خاوه‌ن رێبازێكن و بوونیان هه‌یه‌ له‌ په‌رله‌مانی عیراق و هه‌رێمی كوردستان، ئێمه‌ پێمان خۆشه‌ ته‌نسیق هه‌بێت، حورمه‌ت گرتن له‌یه‌كتری هه‌بێت، نه‌ ئه‌وان ده‌توانن نكوڵی بكه‌ن له‌ بوونی یه‌كێتی، نه‌ ئێمه‌ش ده‌توانین ئه‌وه‌ بكه‌ین، ئه‌وان له‌سه‌ر گۆڕه‌پانه‌كه‌ن، ئێمه‌ بۆ هه‌ر نێوانی گۆڕان و یه‌كێتی باس بكه‌ین، بۆ نێوانی گۆڕان و ئیسلامی، گۆڕان و پارتی، گۆڕان و لایه‌نه‌كانی تر، بۆ ئێمه‌ هه‌ر به‌و چاوه‌وه‌ سه‌یری  نه‌كه‌ین، ره‌نگه‌ له‌كاتی لێكترازانه‌كه‌دا نێوانی ئێمه‌و گۆڕان بێت، به‌لام دوای ساڵێك ئێستا نێوانی ئێمه‌و گۆڕان نییه‌، میلله‌ت و گۆڕانه‌، لایه‌نه‌ سیاسییه‌كان و گۆڕانه‌، ئه‌گه‌ر قسه‌ی باشیان كردو هه‌ڵوێستی باشیان هه‌بوو ئێمه‌ سه‌دجار ده‌ستخۆشیان لێده‌كه‌ین، خراپه‌شیان كرد ئه‌وه‌ میلله‌ته‌كه‌ خۆی ده‌توانێت بڕیار بدات، كلیلی گۆڕان له‌ده‌ستی ئێمه‌دا نییه‌، هه‌ڵسه‌نگاندنه‌كه‌ ئه‌وه‌بێت كه‌ بڵێن باشن ئه‌وا باشن یان ئه‌گه‌ر خراپ بوون بڵێن خراپن، ئه‌وه‌شتێكی خراپه‌، هی ئێمه‌ش به‌ ده‌ست گۆڕان نییه‌، ئێمه‌ میلله‌ته‌كه‌ بڕیار ده‌دات.

*له‌م سه‌روبه‌نده‌دا زۆر باسی مافی چاره‌نووس ده‌كرێت، له‌دواهه‌مین كۆنگره‌ی پارتیشدا ئه‌مه‌ باسكرا، وه‌ك خۆشتان ده‌زانن له‌پایزی ساڵی 1983دا مافی چاره‌نووس بۆ گه‌لی كورد له‌لایه‌ن یه‌كێتییه‌وه‌ راگه‌یه‌ندرا، ئه‌م خاڵه‌ واته‌ مافی چاره‌نووس به‌ جۆرێك له‌ جۆره‌كان نابێته‌ هۆی زیاتر پته‌وكردنی په‌یوه‌ندیی ستراتیژی نێوان یه‌كێتی و پارتی؟ 

-رێككه‌وتنی ستراتیژی زیاتر خاڵه‌ ئه‌ساسی و میحوه‌رییه‌كانی به‌خۆیه‌وه‌ گرتووه‌، ئێمه‌و پارتی ره‌نگه‌ له‌ هه‌ندێك شتدا وه‌ك شته‌ ستراتیژییه‌كان یه‌ك و یه‌كگرتوو بین، له‌هه‌ندێ شتیشدا جیاوازیمان هه‌یه‌، ئه‌وه‌ شتێكی سروشتییه‌، له‌ناوخۆماندا له‌ناو یه‌كێتیدا ره‌نگه‌ هه‌ندێك جیاوازی هه‌بێت، له‌ناو پارتیشدا ره‌نگه‌ جیاوازییان هه‌بێت، خۆ ئێمه‌ ئه‌گه‌ر له‌سه‌ر شته‌ نه‌ته‌وه‌یی و نیشتمانیی و چاره‌نووسسازه‌كان یه‌كبین ئه‌وه‌ قازانجی له‌هه‌ردوولاو میلله‌تدایه‌،  ئه‌مه‌ی كه‌ پارتی باسی كردووه‌ شتێكی تازه‌ نییه‌، مافی چاره‌ی خۆنووسین مافێكی ره‌وایه‌، له‌ ده‌ستووره‌كانی هه‌موو دنیادا هاتووه‌، نه‌ته‌وه‌ یه‌كگرتووه‌كان و مافی مرۆڤ دانی پێدا ناوه‌، واته‌ شتێك نییه‌ تازه‌ بێت بۆ ئێمه‌، بۆ یه‌كێتیش ئه‌مه‌ شتێكه‌و هه‌ر له‌سه‌رده‌می شاخه‌وه‌ باسیكردووه‌، به‌لام مافی چاره‌ی خۆنووسین ئێمه‌ ئێستا به‌چی تێده‌گه‌ین، ئێستا ئێمه‌ به‌ فیدرالیی تێده‌گه‌ین، فیدرالییه‌ته‌ بۆ ئێمه‌ كه‌ مافی چاره‌ی خۆنووسین بۆ ئێمه‌ ئێستا وای لێهاتووه‌، پێش چه‌ند ساڵێك ئۆتۆنۆمی بوو، دوای ئه‌وه‌ بوو به‌ ئۆتۆنۆمی حه‌قیقی، ئێستا مافی چاره‌ی خۆنووسین فیدرالیه‌ته‌، كێ ده‌ڵێ ده‌ساڵی تر شتێكی دیكه‌ نابێت، گه‌شه‌كردنه‌كه‌ سروشتییه‌، به‌لام ته‌فسیراته‌كان هه‌ریه‌كه‌و به‌جۆرێك ده‌یكات به‌تایبه‌تی دوژمنانی كورد ره‌نگه‌ بیانه‌وێت ئه‌وه‌ به‌ جۆرێك ته‌فسیر بكه‌ن كه‌ ئه‌مه‌ كوفره‌، ئه‌مه‌ كوفر نییه‌.