ڕۆژنامەی دەیلی ستار: ئەگەری دروستبوونی دەوڵەتی کوردی لە ماوەیەکی نزیکدا لە ئارادایە 10/20/2013

ڕۆژنامەی دەیلی ستاری چاپی لوبنان، لە راپۆرتێکدا دەربارەی رەوشی ڕۆژهەڵاتی ناوەڕاست دەنووسێت: لە هەرێمی کوردستاندا کوردەکان ناوچەیەکیان بۆ خۆیان دروست کردووە و تێیدا بە ئارامی دەژین و پەیوەندییەکی باشیشیان لەگەڵ دەوروبەردا هەیە، هەروەها خەریکە هەنگاو بە هەنگاو لە راگەیاندنی سەربەخۆیی نزیک دەبنەوە.
kurdistanmap
رۆژنامەكە هەروەها ئاماژە بەوە دەدات كە پێشکەوتن و ئارامیی هەرێمەکە، هۆکاری سەرەکیی نزیکبوونەوەی کوردە لە سەربەخۆیی. دەیلی ستار دەشنووسێت “بە بوونی سەرچاوەی سرووشتیی زۆر و لە نێویشیاندا نەوت، هەروەها بوونی پێوەندییەکی باش لەگەڵ وڵاتانی دەوروبەر لەوانەش تورکیا، دروستبوونی دەوڵەتی کوردی لە ماوەیەکی نزیکدا لە ئارادایە.”

لە بارەی پەیوەندیی هەرێمی کوردستان و تورکیا، دەیلی ستار دەڵێت: هەرێم بەردەوام ڕێزی یەکڕیزی و یەکپارچەیی خاکی تورکیای گرتووە و رایگەیاندووە کە بە هیچ شێوەیەک دەست ناخاتە نێو کاروباری تورکیا و خوازیارە پرسی کورد لەو وڵاتەدا بە شێوەیەكی ئاشتیانە چارەسەر بكرێت، چونکە ئاسایش و ئارامیی هەرێمەکەی خۆی زۆر بەلاوە گرنگە.
لەبارەی چۆنیەتیی دروستبوونی دەوڵەتی کوردی وەک لە سەرەتای راپۆرتەکەدا ورووژاندوویەتی، دەیلە ستار نووسیویەتی “دروستبوونی دەوڵەت پشت دەبەستێت بە ئامانج و هیوای نیشتمانیی کوردەکان، لەوانەش بەهێزیی هەرێم و هیوای باکوور و کۆنفیدراڵی لە رۆژئاوای کوردستان.” هەروەها دەشنووسێت كە رەنگە هەندێک وڵاتی ناوچەکە رێگر بن لە دروستبوونی دەوڵەتی کوردی.

سەبارەت بە راگەیاندنی دەوڵەتی کوردی لە هەرێمی کوردستاندا، دەیلی ستار ئاماژەی داوە: ناوچەی دیکەش ئەو پرسەیان لا دروست دەبێت.

دەیلی ستار دێتە سەر باسی نەخشەی نوێ لە رۆژهەڵاتی ناوەڕاست و دەڵێت: بەشێک لە دەسەڵاتداران لە رۆژهەڵاتی ناوەڕاست ترسیان لەو پێشهاتە چاوەڕوانکراوە هەیە و، لەوانەشە ئەو نەخشەیەی پێشتر بە هۆی پەیماننامەی سایکس بیکۆ دروست بوو، دووبارە بکێشرێتەوە، ئەمەریکی و ئەورووپییەکان فێری ئەوە بوون کە ئیتر سیاسەتی دەرەکیی ئەوان ناتوانێت رێ لە دووبارە کێشانەوەی نەخشەی ڕۆژهەڵاتی ناوەڕاست بگرێت و ناتوانن ببن بە ئەندازیاری ئەو نەخشەیە.

میدیا جیهانییەکان بە هۆی پێشکەوتنی هەرێمی کوردستان و ئەو رەوشەی کە ئێستا لە رۆژهەڵاتی ناوەڕاست هەیە، رۆژانە راپۆرت و هەواڵ لە بارەی سەربەخۆیی کورد و ئەگەری دروستبوونی دەوڵەتی کوردی بڵاو دەکەنەوە، بەشێکیش لەوان هەرێمی کوردستان بە دوورگەیەکی ئارام لە نێو چەندین وڵاتی پڕ لە کێشە و ململانێی تایفی ناو دەبەن، ئاژانسی هەواڵی رۆیتەرزیش لە نوێترین راپۆرتی خۆیدا دەربارەی هەرێمی کوردستان و ئەگەری سەربەخۆبوونی هەریمی کوردستان لە رووی ئابوورییەوە نووسیویەتی ” تەواوبوونی بۆریی نەوتی هەرێمی کوردستان – تورکیا، هەرێم بەهێزتر دەکات و داهاتێکی زۆرتری لەوەی ئێستا دەست دەکەوێت لە بەغدا. هەروەها دەشنووسێت کە خاڵی وەرچەرخانی کورد تەوابوونی ئەو بۆرییە نەوتەیە، بۆ ئەوەی لە سەربەخۆییەک نزیکی بکاتەوە کە دەمێکە بەدوایدا دەگەڕێت.